WENGI DESEMBER
Sajake angin lagi sesingidan ing waliking gegodhongan
lintang-lintang uga lagi lumuh pilih kekudhung mega
lan wengi Desember nembangake lelagon sepa
nunggu gumrojoge udan kang kelangan mangsa
Sepi kang kuwawa ngrerujit ati
rikala liyeping mripat mung ngiwi-iwi
kabuncang pangangen nrajang wektu-wektu kang wus adoh lumaku
tansaya kepingin kabuwang
tansaya rosa angadhang
Apa pancen katresnan iku mung impen
sinelip ing antaraning panguripan
amarga kanyatan kerep nyulayani pangarep
Apa urip iku mung isi panandhang
rikala kabeh gegayuhan mung ambyar ing tawang
nalika suku napak ing lemah
sanyatane tan bisa agawe bungah
Wengi Desember kadya swaraning nala kang krodha
nyoba nduwa kabeh kang gawe kuciwa
nanging sanyatane urip mung saktitahe
ora perlu mbebujung lintang
apa ngunggahi kluwung
Cukup jumangkah kanthi sumringah
nyisihake sakabehing rasa susah
amarga wektu terus lumaku
ora bakal maelu rasaning atimu
Semarang, 2 Desember 2020
